Միջազգային գիտաժողովում քննարկվեցին կառավարման հիմնախնդիրներ

Հոկտեմբերի 10-ին ՀՀ պետական կառավարման ակադեմիայում մեկնարկել է «Կառավարման ժամանակակից հիմնախնդիրներ» խորագրով միջազգային գիտաժողովը, որին մասնակցում են նաև Ռուսաստանից և Վրաստանից ժամանած գիտնականներ: Գիտաժողովի նպատակը ժամանակակից կառավարման հիմնախնդիրները և դրանց հնարավոր լուծումները քննարկելն է, գիտական հետազոտությունների արդյունքները ներկայացնելը, ձևափոխվող հասարակությունում կառավարման ժամանակակից մարտահրավերները և դրանց լուծման ուղիները բացահայտելը, կառավարման հոգեբանության արդի հիմնախնդիրները ուրվագծելը:

Գիտաժողովի լիագումար նիստում մասնակիցներին ողջունեց ՀՀ պետական կառավարման ակադեմիայի ռեկտոր Արսեն Լոքյանը: Նա հույս հայտնեց, որ գիտաժողովն իր ներդրումը կունենա գիտության և տեխնոլոգիաների ոլորտի կառավարման համակարգի կատարելագործման, ինչպես նաև միջազգային գիտական համագործակցության զարգացման գործում:

«21-րդ դարում տեղի ունեցող ինտեգրման և գլոբալացման գործընթացները վերաիմաստավորում են պետության դերն ու նշանակությունը, փոխում կառավարման փիլիսոփայությունը, նպատակներն ու խնդիրները,- ասաց Արսեն Լոքյանը:- Զարգացած գիտությունը ուժեղ պետության ցուցանիշ է, և գիտական նվաճումները վկայում են պետության տնտեսական զարգացման աստիճանի ու միջազգային հեղինակության մասին: Ուստի թե՛ միջազգային գործընթացները և թե՛ գիտության դերի մեծացումը հանգեցրին նրան, որ ներկայումս գիտության կառավարման համակարգի վերափոխումներ են ընթանում աշխարհի գրեթե բոլոր զարգացած երկրներում»:

Կառավարման ակադեմիայի ռեկտորը համոզմունք հայտնեց, որ երկօրյա համատեղ աշխատանքի արդյունքում կգտնեն բազում խնդիրների լուծումներ: Նշեց, որ գիտաժողովի եզրահանգումները կնպաստեն մասնակից երկրների կառավարման համակարգերի արդյունավետության բարձրացմանը և կօգնեն նախանշելու ոլորտի զարգացման հեռանկարները:

ՀՀ կրթության և գիտության նախարարության գիտության պետական կոմիտեի նախագահ Սամվել Հարությունյանը կարևորեց ՀՀ պետական կառավարման ակադեմիայի՝ որպես գիտության կառավարման և պետական կառավարման ոլորտներում ուսումնասիրություններ իրականացնող հաստատության դերը: Նա շեշտեց գիտության ոլորտի կառավարման անհրաժեշտությունը և կարծիք հայտնեց, որ Կառավարման ակադեմիայում կարելի է գիտության կառավարման վերաբերյալ դասընթաց անցկացնել:

ՀՀ պետական կառավարման ակադեմիայի հոգեբանության ամբիոնի վարիչ Ռուբեն Աղուզումցյանը հույս հայտնեց, որ գիտաժողովը կծառայի հիմնական նպատակին, այն է՝ բոլոր ոլորտների կառավարումն իրականացնել գիտական հիմքի վրա:

Գիտաժողովի լիագումար նիստում առաջինը հնչեց ՀՀ ԿԳՆ գիտության պետական կոմիտեի նախագահ Սամվել Հարությունյանի՝ «Գիտության ոլորտում իրականացվող բարեփոխումների ընթացքը. ապագային միտված ծրագրեր» խորագրով զեկուցումը: Նա ներկայացրեց Գիտության պետական կոմիտեի հիմնադրման պատմությունը, նրա կառուցվածքը և այն քայլերը, որոնք ուղղված են գիտության զարգացմանը:

Սանկտ Պետերբուրգի պետական համալսարանի ամբիոնի վարիչ Վիկտոր Ալախվերդովը խոսեց գիտակցության, ստեղծագործության և կառավարչական գործունեության ընթացքում դրանց դերի մասին: Նրա բնորոշմամբ, թեև հաճախ խնդրի լուծումը գալիս է անսպասելի, սակայն այն ազդանշան է տալիս, պարզապես «պետք է նկատել այն և բաց չթողնել պահը, երբ հնչում է զանգը»:

Հայ և ռուս ուսանողների շրջանում կատարված ուսումնասիրությունները ներկայացրեց Ռուսաստանի գիտությունների ակադեմիայի հոգեբանության ինստիտուտի ինժեներական հոգեբանության և էրգոնոմիկայի լաբորատորիայի ավագ գիտաշխատող Ալեքսանդր Օբոզնովը: Ուսումնասիրությունները նվիրված էին ծառայողների անձի նորմատիվ ուղղվածության մասին ուսանողների պատկերացումներին: Հետաքրքիր է, որ երկու երկրներում էլ ապագա կառավարիչները պետական համակարգն առաջին հերթին դիտարկում են որպես ինքնադրսևորման, ինքնիրացման հնարավորություն:    

Հայաստանում կառավարիչներ պատրաստելու գործընթացը երկար պատմություն չունի, սակայն ՀՀ պետական կառավարման ակադեմիան՝ որպես պետական համակարգի համար կադրեր պատրաստող հաստատություն, արդեն հեղինակություն է ձեռք բերել: Ակադեմիայի կառավարման հոգեբանության ամբիոնի վարիչ Ռուբեն Աղուզումցյանն անդրադարձավ կառավարիչների գործունեության կադրային քաղաքականության հոգեբանական աջակցության խնդրին՝ տեղեկացնելով, որ Կառավարման ակադեմիայում բոլոր դիմորդները հայտ ներկայացնելիս հոգեբանական թեստ են լրացնում, ինչը հնարավորություն է տալիս բացահայտելու նրանց հոգեբանական պատկերը:

Գիտաժողովի առաջին օրը հնչեցին մեկ տասնյակից ավելի զեկուցումներ, որոնց հեղինակներն անդրադարձան գիտական համակարգի կառավարման արդյունավետության բարձրացման, գիտության ենթակառուցվածքների արդիականացման, միջազգային գիտական համագործակցության զարգացման, գիտության կառավարման ոլորտի կադրերի նպատակային պատրաստ­ման ու վերապատրաստման, որակավորման բարձրացման և այլ հարցերի:

Հոկտեմբերի 10-ին մեկնարկած «Կառավարման ժամանակակից հիմնախնդիրներ» խորագրով միջազգային գիտաժողովը շարունակվեց նաև հոկտեմբերի 11-ին: Ամփոփելով գիտաժողովի արդյունքները և գնահատելով կատարված աշխատանքները՝ ՀՀ ՊԿԱ ռեկտոր Արսեն Լոքյանը զեկուցողներին հանձնեց վկայագրեր: